أهازيج وهتافات المتظاهرين في تحديد مواصفات رئيس الوزراء الجديد

أهازيج وهتافات المتظاهرين في تحديد مواصفات رئيس الوزراء الجديد

 ذي قار / حسين العامل

دأب المتظاهرون في ساحات التظاهر بالمحافظات العراقية المنتفضة للتذكير بالمواصفات والشروط التي حددوها لقبول المرشح لمنصب رئيس الوزراء المتمثلة بالاستقلالية والنزاهة والكفاءة وأن لا يكون من مزدوجي الجنسية ،

وقد وظفوا تلك المواصفات في العديد من شعاراتهم وهتافاتهم وأهازيجهم التي رددوها عقب إعلان رئيس مجلس الوزراء عادل عبد المهدي عزمه تقديم استقالته الى مجلس النواب العراقي في أواخر تشرين الثاني 2019.

إذ ردد متظاهرو الشطرة في النصف الثاني من كانون الأول 2019 :

نريد إلنه قائد مو مثل هذي النفايات 

نريد إلنه قائد مو مثل ذيول السفارات 

منريد قائد جعفري ، تاليها يطلع سرسري 

قائد شريف ومو مهم عدنه الديانات 

منريد إللي يذل للغرب ويبيع الاوطان 

منريد اللي يجوع الشعب ويشبع إيران 

تبت يدا كل تبعي ، ثورتنه بس بيها الوعي 

ما تقبل بذيل إللي يحن كلبه عالطهران. 

فيما وردد متظاهرو محافظة ذي قار يوم الجمعة ( 17 كانون الثاني 2020 ) للتذكير بأبرز مواصفات ومعايير اختيار رئيس الوزراء :

ريس مو من الاحزاب ، يحدد يوم الانتخاب 

لا يورطني بين إيران وبين امريكا المشؤومة

في حين ردد متظاهرو الفهود المشاركين في تظاهرات ساحة الحبوبي يوم الجمعة ( 21 شباط 2020 ) للتعبير عن رفضهم المحاصصة الحزبية في اختيار رئيس الوزراء وكابينته الوزارية :

شما ظنوا كضت من أول تعود ، ذي قار الشرارة إلبيها الفهود

لا كابينة تعبر لا وزارات ، حصتي وحصّتك إتقسموها هيهات

واعي الشعب صار الـجـان مكرود

حصة زيد هاي وذيـﭻ لعبيد ، ما تعبر علينه ومو مكاريد

ما عدت عليكم بالسلامات ، بأولها بعدنه وعدنه ثورات

من كاعه الحكم يحتاج تجديد

في حين هتف متظاهرو الشطرة يوم الاثنين ( 17 شباط 2020 ) لتجديد رفضهم مرشح الاحزاب الفاسدة لمنصب رئيس الوزراء:

واهم اليتوقع بذوله شريف 

انت سامع إبفاسد إيحطله نظيف 

همه المرشحينه ، وفرضوا الكابينه 

لا تدور عالثـكـل يم الخفيف 

*

بعد ما تمشي علينه وعودهم 

لازم إيعرفون وين احدودهم 

والشعب دك ثايه ، رايه تتبع رايه 

ذوله ثوّار وشهيد يقودهم

وهتف متظاهرو قلعة سكر في ساحة الحبوبي بالناصرية يوم السبت ( 15 شباط 2020 ) حيث تتوافد مجاميع من المتظاهرين في الاقضية النواحي على ساحة التظاهرات في مركز مدينة الناصرية لدعم الاعتصام في ساحة الحبوبي :

ما يبقه الواقع موجود ، يتغير لازم 

واليتخيل يبقه الحال هذه أكبر واهم 

لازم ينزال الباطل ، يتنصب حاكم عادل 

مو عادل هذه الموجود لازم يتغير 

الله الله اكبر 

وكذلك هتف متظاهرو الناصرية يوم الثلاثاء ( 4 شباط 2020 ):

لا تجيني وتحجي باسم الوطنيه 

أنه واعي وذني ما يمشن عليه 

لا تجيني وتمدلي ايدك ، انه طالع ما اريدك 

لا تمثل يالبــكـت دور الضحية 

هذا ياهو الطابخ الطبخه إبمزاجه

ورشحلنه إلما يحل رجل الدجاجه

من زمان ويانه خرب

والمجرب لا يجرب

ما نريده والشعب زاد احتجاحه

وردد متظاهرو ناحية البطحاء الذين تظاهروا في ساحة الحبوبي يوم الجمعة ( 21 شباط 2020 ) للتعبير عن رفضهم تكليف مرشح محسوب على احزاب السلطة لمنصب رئيس الوزراء : 

يا احزاب السلطة اشتردون ، طلعتوها من الماعون 

باسم الشعب مرفوضين والفاسد يطلع

ورفع المتظاهرون في ساحة الحبوبي بالناصرية يوم السبت ( 1 شباط 2020 ) لافتات تحمل صور لاحد مرشحي الاحزاب موشومة بعلامة ( × ) وكتبوا عليها ( كلا لتدوير النفايات ، مرفوض بأمر الناصرية ) كما رددوا ( قرار الشعب هذا ولازم تهابه ، مرشحكم نرفضه ونرفض الجابة ) . 

وردد متظاهرو ساحة الصدرين في النجف في دسته ثورية يوم الاحد (16 شباط 2020):

والله والله ما نتراجع 

لو ظلت الاحزاب يبق الحال نفسه 

الننزعه من اليمنه باليسره نلبسه 

دم الشهيد يريد حقه شلون ننسه 

صوت الثوره باقي ميظل بس عراقي 

والله والله ما نتراجع

في حين رددت حشود المتظاهرين خلف احدى المتظاهرات في ساحة التحرير يوم الاحد ( 16 شباط 2020 ) هتافات تحدد مواصفات الحكم رشيد في ظل دولة المدنية:

كافي اتاجر بينا ، كافي 

ما نسكت ملينه ، كافي

لا هجرة وتهجير ، كافي

إنريد التعمير ، كافي

نتظاهر سلمية ، كافي

الدولتنه المدنية ، كافي

وردد متظاهرو الحلة مطلع شهر شباط 2020 :

لا تجبرني لا تجبر احزابك إرفضناها 

انسى ترجع تحكمني ، بحلامك اتمناها 

دولتنا نريد انردها ونرد ضحكتها وياها

ترجع توكف ذي قاري والحله عد يمناها.

فيما رفع متظاهرو البصرة لافتة كبيرة تحمل صورة احد مرشحي الاحزاب وكتب عليها ( والعباس مرفوض ) كما هتفوا ( لا احزاب ولا بطيخ احنه نادينه ، واليركب موجتنه يريد نفكسله عينه) .

Top